वर्षा ऋतू

उदास होतीस उजाड होऊन
थकल्या सुकल्या नयना आडून
वृथा विनविशि खग राजाला
उत्सुक नभ हा तुझ्या मीलना
जलधारांनी तुझ्याकडे धावला, आला वर्षा ऋतू आला

तृप्त सोहळा तृप्त धरित्री
तृण पात्यांची हिरवळ प्याली
शत धारांनी भिजली माती
हळूच ओढते हिरवा शालू
बिलगुनी सरितेच्या काठा, आला वर्षा ऋतू आला

बरसून जाता भार ऋतूचा
भाग्यविधात्या रविराजाचा
भालप्रदेशी कुंकुम ल्याली   
नव निर्माणा सुसज्ज जाहली 
अल्लड नवरी धरणी माता, आला वर्षा ऋतू आला
रचना: हेमंत केतकर