वर्तमान

कशासाठी खोदतो बेटा
भूतकाळातील थडगी
अंधारल्या मैदानावर
झोपलेली मडकी

अर्धे आयुष्य सरले तुझे
झेपावताना पुढे पुढे
अज्ञाताची वाट सारी
तरी तुझे मन का कुढे?

स्वार्थ ज्यांना प्रिय होता
त्यांचा त्यांनी साधला
तुझा तो हेतू नव्हता मुळी
म्हणून तू निघून गेलास

एक स्मशान टाकले मागे
हपापलेल्या भूतांचे
तरी मन का गजबजते?
आठवून त्यांचे हेवे दावे

अशी स्मशाने रोज तू
सरावाने पार केली
मार्गी तुझ्या नशिबाने
गुरु शक्ती साथीस आली

ती शक्ती सांगते तुला
मी ब्रह्म आहे
तुझा अहं विसरण्यासाठी
हा मायाजाल आहे

तुझाच जीव, तुझाच देव
साऱ्या जगात भरला आहे
वेली,झाडे,माणसे,प्राणी
यात तो व्यापला आहे

भूतकाळातील हवा ती
मनात साठे, तमात दाटे
गाभाऱ्यातील ज्योतीला
तिच्यापासून धोका वाटे

म्हणून म्हणतो बेटा तुला
नको खोदू जुनाट थडगी
अंधाऱ्या हवेस आत येण्या
उघडू नको आठवणींची खिडकी
रचना: हेमंत केतकर